வன்முறையிலிருந்து மீண்டெழுந்தவர்கள் ஆய்வு, கொள்கை உரையாடல் மற்றும் செயற்றிட்ட வடிவமைப்பு ஆகியவற்றில் அர்த்தமுள்ள வகையில் பங்களிப்பதற்கான தளமாக அமையும் குழுக்களை நிறுவுவதே பணித் தொகுப்பு 1 இன் நோக்கமாகும். சமூக ஆலோசனைச் சபைகள் போன்ற மரபுவழி ஈடுபாட்டு முறைகளுக்கு அப்பால் இக்குழுக்கள் செல்கின்றன. இங்கு வன்முறையிலிருந்து மீண்டெழுந்தவர்கள் பங்கேற்பாளர்களாக மட்டுமன்றி, இணை ஆய்வாளர்களாகவும், பங்களிப்பாளர்களாகவும் செயற்படுவர். இப்பணித் தொகுப்புக்கு மூன்று நோக்கங்கள் உள்ளன. முதலாவது, பங்குதாரர் குழுக் கலந்துரையாடல்கள் மூலம் ஆய்வில் வன்முறையிலிருந்து மீண்டெழுந்தவர்களின் ஈடுபாட்டுக்கான தடைகளையும், ஊக்கிகளையும் ஆராய்தல். இரண்டாவது, பல்வகைமையும் உள்ளடக்கமும் பிரதிநிதித்துவமும் கொண்ட ஆலோசனைக் குழுக்களை நிறுவுதல். மூன்றாவது, அக்குழுக்களின் அனுபவங்கள், சாத்தியப்பாடு மற்றும் அதன் தாக்கத்தை மதிப்பீடு செய்து, கற்றுக்கொண்ட பாடங்களை ஆவணப்படுத்துதல்.
இந்தச் செயற்பாட்டுத் தொகுப்பு வன்முறையால் ஏற்படும் சுகாதாரப் பாதிப்புகளை ஆராய்கிறது. வன்முறையினால் ஏற்படும் உடல், மன மற்றும் சமூக ரீதியான பாதிப்புகளைப் புரிந்துகொள்வதற்காக, ஏற்கனவே உள்ள தரவுகளைப் பகுப்பாய்வு செய்தல், கணக்கெடுப்புகளை நடத்துதல் மற்றும் போதிய சேவைகள் கிடைக்காத சமூகங்களின் பங்கேற்பை உறுதிப்படுத்துதல் ஆகிய நடவடிக்கைகளை மேற்கொள்கின்றோம்.
வன்முறை பல்வேறு பரந்த பொருளாதாரத் தாக்கங்களை ஏற்படுத்துகிறது. செயற்பாட்டுத் தொகுப்பு 3 (WP3), இந்தச் செலவுகளை மதிப்பிடுவதற்காகத் தரவுகள், முறைமையான ஆய்வுமதிப்புரைகள் மற்றும் கவனக்குழுக் கலந்துரையாடல்களைப் பயன்படுத்துகிறது. மேலும், வன்முறையைத் தடுப்பதற்கும் அதனை எதிர்கொள்வதற்கும் நடவடிக்கை எடுக்காததால் தனிநபர்கள், சமூகங்கள் மற்றும் ஒட்டுமொத்தச் சமுதாயத்தின் மீது ஏற்படும் விளைவுகளை எடுத்துரைக்கிறது.
வன்முறையைத் தடுப்பதற்கான பயனுள்ள உத்திகளைக் கண்டறிவதே எமது நோக்கமாகும். இதற்காக, வழிகாட்டிக் கருவித்தொகுப்புகளை உருவாக்குதல், கலாசார உணர்வுகளைக் கருத்திற்கொண்ட மதிப்பீட்டுக் கட்டமைப்புகளை உருவாக்குதல், சிறந்த நடைமுறைகளுடன் ஒப்பிட்டு கொள்கைகளை மதிப்பீடு செய்தல், அடையாளம் காணப்பட்ட குறைபாடுகளை நிவர்த்தி செய்வதற்கும் பாதுகாப்பான சமூகங்களை உருவாக்குவதற்கும் தலையீட்டு நடவடிக்கைகளை முன்னோட்டமாகச் செயற்படுத்திப் பரிசோதித்தல் ஆகியவற்றை மேற்கொள்கின்றோம்.
செயற்பாட்டுத் தொகுப்பு 5 (WP5), நிலையான ஆராய்ச்சி ஆற்றலை வலுப்படுத்துவதுடன், சமத்துவமான உலகளாவிய அறிவுப் பரிமாற்றத்தையும் ஊக்குவிக்கிறது. எளிதில் அணுகக்கூடிய பயிற்சிகள், வழிகாட்டல் மற்றும் திறந்த அணுகல் வளங்களை வழங்குவதன் மூலம், குறைந்த மற்றும் நடுத்தர வருமானம் கொண்ட நாடுகளைச் (LMIC) சேர்ந்த ஆராய்ச்சியாளர்களுக்கும், வன்முறையால் பாதிக்கப்பட்டவர்களுள் ஆராய்ச்சியில் ஈடுபடுவோருக்கும் ஆதரவளிக்கிறது. அதேவேளை, நீண்டகால உலகளாவிய ஆராய்ச்சி வலையமைப்புகளை உருவாக்குவதற்கும் பங்களிக்கிறது.