පවුල් සෞඛ්‍යය පිළිබඳ සහතික පාඨමාලාවේ සමාරම්භක උත්සවය 2025 අප්‍රේල් 3 වන දින යාපනය විශ්වවිද්‍යාලයේ වෛද්‍ය පීඨයේ සායනික පුහුණු හා පර්යේෂණ ගොඩනැගිල්ලේ ශ්‍රවණාගාරයේදී පැවැත්විණි. මෙම උත්සවය වෛද්‍ය පීඨයේ ඩිජිටල් වසංගතවේදය පිළිබඳ මධ්‍යස්ථානය සහ යාපනය විශ්වවිද්‍යාලයේ විවෘත හා දුරස්ථ ඉගෙනුම් මධ්‍යස්ථානය එක්ව සංවිධානය කරන ලදී.
යාපනය විශ්වවිද්‍යාලයේ උපකුලපති මහාචාර්ය එස්. ශ්‍රීසත්ගුණරාජා මහතා ප්‍රධාන ආරාධිත අමුත්තා ලෙස මෙම අවස්ථාවට සහභාගී විය. වෛද්‍ය පීඨයේ පීඨාධිපති මහාචාර්ය ආර්. සුරේන්තිරකුමාරන් මහතා, විවෘත හා දුරස්ථ ඉගෙනුම් මධ්‍යස්ථානයේ අධ්‍යක්ෂ මහාචාර්ය ජේ. රොබින්සන් මහතා, උතුරු පළාත් සෞඛ්‍ය සේවා දෙපාර්තමේන්තුවේ වෛද්‍ය නිලධාරී (සැලසුම්) වෛද්‍ය ලලානි පතිරණ මහත්මිය ඇතුළු ප්‍රමුඛ පෙළේ විද්වතුන් රැසක් ද මෙම අවස්ථාවට එක්වූහ.
ඩිජිටල් වසංගතවේදය පිළිබඳ මධ්‍යස්ථානයේ සායනික පර්යේෂණ හා මෙහෙයුම් සම්බන්ධීකාරක වෛද්‍ය එස්. කුමාරන් මහතා විසින් පිළිගැනීමේ කථාව පවත්වන ලදී. ළමා රෝග විද්‍යා අංශයේ ප්‍රධානී මහාචාර්ය එම්. ජී. සත්‍යාදාස් මහතා සහ ප්‍රසව හා නාරිවේද අංශයේ ජ්‍යෙෂ්ඨ කථිකාචාර්ය වෛද්‍ය එස්. රගුරාමන් මහතා විසින් පිළිවෙළින් ළමා පෝෂණය සහ ප්‍රජනක සෞඛ්‍යය සම්බන්ධයෙන් ප්‍රජා සෞඛ්‍ය සේවකයන් ඉටුකරන වැදගත් කාර්යභාරය පිළිබඳ දේශන පවත්වන ලදී. මෙම සහතික පාඨමාලාව ආරම්භ කිරීම සඳහා කැනඩාවේ සිටින යාපනය වෛද්‍ය පීඨයේ විදේශීය ආදි ශිෂ්‍යයන්ගේ සංගමය ලබාදුන් දායකත්වය පිළිබඳව ද වෛද්‍ය රගුරාමන් මහතා සඳහන් කළේය.
දිගුකාලීන රෝගී තත්ත්වයන් සමඟ ජීවත්වීමේදී මුහුණදීමට සිදුවන අභියෝග පිළිබඳව අවධානය යොමු කළ නාට්‍යමය ඉදිරිපත් කිරීමක් ද මෙහිදී පැවැත්විණි. ඉන් අනතුරුව මහාචාර්ය සුරේන්තිරකුමාරන් මහතා, මහාචාර්ය රොබින්සන් මහතා සහ ප්‍රධාන ආරාධිත අමුත්තා වූ මහාචාර්ය ශ්‍රීසත්ගුණරාජා මහතා විසින් දේශන පවත්වන ලදී.
